ТВ Пакет Единствен телевизиски информативен портал во Македонија
Од вечерва на програмата на Сител телевизија ќе се емитува серијата „Будва“. Се работи за серија која настана како соработка помеѓу Србија и Црна Гора и како таква особено добро е прифатена од публиката.
На „Будва на морската пена“, како што гласи целосното име, се работеше во текот на сезоната 2011-2012 и засега има две сезони со нешто повеќе од 20 епизоди по 45 минути. Жанрот на серијата е драма-комедија. Во главните улоги се појавуваат Милутин Караџиќ, Љиљана Благојевиќ, Сања Јовичевиќ и Момчило Караџиќ. За режијата се погрижи Милан Караџиќ.
„Будва на морската пена“ е драмска серија која за кратко време стана една од најгледаните телевизиски формати во регионот. Првата сезона ја карактеризираат возбудливи случувања кои ја отсликуваат транзиционата турбуленција не само во Будва туку и во сите Екс Ју држави. Судирот на новите богаташи со осиромашениот „остаток на светот“, нежна љубовна приказна и возбудливи афери, елементи на трилер и мотиви на одмазда се драматуршките обрасци на кои се темели оваа телевизиска сторија.
Бескрупулозниот тајкун Саво Бачиќ, газејќи преку сите законски и морални норми, ја шири својата градежна империја на Црногорското приморје. Нему му се спротивставува инспекторката Олга Радмиловиќ и тоа иницира жесток судир меѓу Бачиќ и братот на Олга , Јово, предвремено пензиониран полицаец. Двете семејства почнуваат сурова војна. Но и покрај тоа, ќерката на Саво, Бојана, и синот на Јово, Лука, започнуваат романса.
Во темниот вилает каде нема среќни решенија ќе се замешаат и таинствениот ловец на богатство, вајарот Мартин, виртуозниот фалсификатор на уметнички дела Луњо кого го прогонува италијански мафијашки бос, љубовницата на Саво, манекенката Лина и уште многу други. Високите продукциски стандарди, извонредна актерска екипа, атрактивната фотографија, досега не видени кадри од Јадранското подморје и тензичните заплети се високите препораки што ја прават оваа серија една од најбараните производи во регионот.
Крис Манев | ТВ Пакет
