Премиери на Сител | Стартува британската наградувана серија „Полдарк“

Телевизија Сител на својата верна публика и ова лето успеа да обезбеди премиерни содржини кои ги пополнуваат вечерните термини.

Па така, по завршетокот на трилер мистеријата “Liar” следува нова серија од продукцијата на BBC која на Сител ќе ја гледате секоја сабота и недела навечер во 23 часот. Историска романса која за миг ќе нѐ однесе со мислите во едно дамнешно време.

Во време каде честа се бранела поинаку, а борбата за љубов, рамноправност и правда ги рушела сите општествени догми. Британска ТВ серија базирана според бестселерот на Винстон Греам која плени со првокласна костимографија и живописни локации крај британското крајбрежје.

Добиничка е на наградата БАФТА од страна на британската публика, како и награда за најдобар перформанс на Националните телевизиски награди.

Во доцниот 18-ти век, Рос Полдарк по долги 3 години војување во американската револуција, ќе се врати во своето родно гратче во Англија. Неговото враќање ќе биде големо изненадување бидејќи сите негови блиски мислеле дека тој е одамна мртов.

Рос верувал дека ќе се врати на стариот живот, но изгледа дека 3 години е доволно време за работите целосно да се изменат. Тој веднаш откако ќе пристигне, ќе открие дека неговиот татко е мртов, неговиот рудник затворен и најважно од сè, девојката која ја љуби е верена за неговиот братучед.

Неговиот дом е во комплетен хаос, а неговото наследство целосно изгубено. Но, овој човек е еден од ретките мажи со силно чувство за правда и одлучност, па токму затоа ќе се обиде сам да ги врати сите работи во нормала така што ќе им ја врати работата на сите рудари кои изгубиле сè со затворањето на рудникот на татко му.

Полдарк доаѓа од богато, имотно и познато семејство, па токму затоа сите млади девојки сакаат да бидат покрај него. Во тоа време репутацијата на девојката е поважна и од нејзината среќа.

Можеби токму тоа е и една од причините зошто Елизабет, девојката која тој мислел дека ќе го чека, го дала својот збор на неговиот братучед.

Но, Рос не се грижи многу за изгледот, ниту пак за репутацијата, па токму тоа ќе го доведе до една сосема нова љубов која никој не би можел да претпостави дека е можна.

Токму оваа љубов, ќе му даде сила да продолжи понатаму, дури и покрај сите оние нешта кои работат против него.

Дани | ТВ Пакет