„Велигденска плетенка“ на Сител со македонски народни песни

Има ли поубаво празнување од она заедно со звуците на македонската песна, младешка убавина “закитена” со македонската традиционална облека, прекрасен амбиент и атмосфера која “поткрева”. Ќе се согласите дека нема…ние сеуште сме народ кој знае како се празнува на вистинскиот начин. А уште повеќе ако гордо го носиш генот на предците од кој одекнуваат планините, ако ја носиш радоста во срцето поради тоа и музикалноста која просто “те тера” да ја даруваш на другите….исто како нашата Елена Јовческа.

Во една таква атмосфера се снимаше нејзиното празнично шоу насловено како “Велигденска плетенка”, во амбиентот на “Македонска Куќа” во Прилеп. Преполна со емоции и задоволна од тоа како се реализираше оваа нејзина идеја, Елена ни ја даде следната изјавa :

”Станува збор за цело сценарио кое што е исполнето со многу музика и каде што ја опишуваме нашата традиција. На самата трпеза имаме традиционални јадења кои ја отсликуваат нашата земја. На мое големо задоволство, ова мое празнично шоу уште повеќе го збогатија Дамјан Стојаноски и Сања Ристеска, сите заедно во друштво на КУД “Мирче Ацев”. Се пееа македонски песни како што му доликува на еден голем за нас, македонски празник. Истите се испеани и отсвирени во живо, а за тоа се погрижи Никола Кочанковски – Кочан.

Со нашата позитивна енергија и расположение привлековме голем број на присутни гости во ресторанот кои љубопитно прашуваа што се снима, а некои од нив уснимија и дел со своите мобилни телефони. Голема благодарност до моите колеги кои ми помогнаа ова мое сценарио да изгледа преубаво, како и до моите драги колеги Мајран Ртоски и Никола Кочан кои исто така испеаа по една песна и беа дел од “Велигденска седенка”. Се надевам дека на 24 април нашите Македонци ќе уживаат во убавата македонска музика и полната и богата трпеза со македонски традиционални јадења”.

Шоуто “Велигденска седенка” се реализираше во соработка со “Арт студио” – продукција, а истото ќе биде емитувано на 24 април на телевизија Сител.

Дани | ТВ Пакет